Tradisi Batak Karo Adat Nge-Sah-Ken Beru
Acara Adat ngesahken beru, terakhir kuliput 8 tahun silewat (2009), I kuta Bah-Bah Buntu, Kec. STM Hulu. Beru Perangin-angin isahken ku jabu kalimbubu Barus mergana.
Langa kin sah jadi beru Kalimbubu, sanga kerja erdemu bayu ?
Tentu enggo sah, enda banci si idah ibas Acara Erbelas Sukut Sinereh. Maka sope erbelas, ilebuh gamet me Singalo ULU EMAS, gelah radu ras cinder ibas tegun Sukut Sinereh.
Bage ilebuh, reh me sekalak Singalo Ulu Emas. Kenca bage, Bapa Sitersereh ngendesken "sebagian" tukur beru man utusen arah Singalo Ulu Emas, ngataken maka sah me anak ipupus Bapa Sitersereh jadi anak ibas jabu Singalo Ulu Emas. Utusen ndai seterusna cinder ras sukut sinereh, biasana seh dung Bapa ras Nande tersereh erbelas. Emaka surut / kundul ia mulihi ku jabuna, jabu Singalo Ulu Emas.
Bagepe ibas Acara Erbelas Singalo Ulu Emas, ilebuh gamet ka sekalak ibas jabu Sukut Sinereh nari. Kenca bage, iendesken Singalo Ulu Emas ka "sebagian" tukur sialokenna man Bapa Sitersereh. Enggo sada jabu, bagelah.
Enggo dung Kerja Erdemu Bayu...
Ukur Nande Siempo, langa erkesehen ngata turangna. Emaka ibahan me kerja Nge-Sah-ken Beru Ku Jabu Kalimbubu.
Kai utang adat si ipeseh guna ngesahken beru ?
Labo lit patoken, tergantung riah ukur nande sitersereh.
Saja, Luah beru sini isahken eme Amak Mbentar ras embahna Kampil. Amak Mbentar bekasna Mbayu, em tandana beru sinisahken enggo metunggung, enggo mbeluh mbayu.
Adi langa beluh mbayu, langa metunggung erjabu / sereh.
Ya, begitulah ceritanya.