Cari

Humor Batak - Didia Rongkap hi

Posted 03-06-2013 21:48  » Team Tobatabo
Adong ma sahalak anak boru naung tobang jala marumur 29 taon ma bulan sampulu on.
Nungnga sai disuru inongna asa marhamulian. Sai didokdo tu boruna on "Didok rohangku nian boru, asa marhamulian ma ho. Nunga tung sihol rohangku mangabing pahompu sian ho. Ia tung ro tibu ma nian jumpang sirongkap ni tondim ale inang" Alai dang jumpangsa dope sirongkap ni tondina.
Disada tingki, naeng mangarsik dengke jahir ma ibana. Topet dipudi jabu nasida adong do gambiri (kemiri). Pas pukkul 5 potang, lao ma ibana mangalilui gambiri. Ditingki na mangalului boras ni gambiri on ibana, adong ma diida sada botol jonok tubona ni gambiri i, penasaran ibana laos dibukka,
Surrrrrr......! Manigor kaluar ma timus sian botol on laos mangihut ma sahalak jin. Tarsonggot jala mabiar ma namarbajuon pola do naing pingsan. Alai marsoara ma jin on jala marhata Batak muse do anggo jin on.
Hira-hira songonon ma panghataion nasida :
Jin : "horas ito, unang mabiar ho"
Borua : "ai ise hamu ito? Boasa boi kaluar sian bagas botol on?"
Jin : "ahu ma nadidokna jin."
Borua : " laho marhua ho jala aha nanihalomohon roham sian ahu?" ( huhut sai mabiar)
Jin : "mauliate hudok parjolo, nungga marribu taon ahu ∂ï bagas botol on, Hape gabe malua ahu nuaing hinorhon ni ho. Jadi adong naing sidohononku tuho."
Borua : "attar aha ma huroa na naeng sidohonon mi? ia paboa ma"
Jin : "songon balosni pambahenanmu, boan ma gambiri i jala ditingki na manutung gambiri i annon pangido ma aha ni halomohon roham. Pas ditutung ho, disi mapultak gambiri i molo hepeng nimmu, mamintor gok ma hepengmu, molo jabu nimmu, pintor jongjong ma jabum. Jala ingot, aha nadidokmu pas mapultak ikkon ma adong."
Borua : "attong nauli mai, mauliate godang ma di ho."
Jadi mulak ma ibana tujabuna huhut sai penasaran do dibagas rohana atik do toho hata ni jin i. Alai husuba majo, ninna rohana ma. Jadi ala dihalomohon rohana do asa marhamulian jala asa tung las roha ni inongna gabe haulion ni rupa ma dipangido ibana. Anggiat gabe adong si doli na marholong ni roha tu ibana laos di oli.
Jadi ditutung ibana ma gambiri on, pintor mapultak ma antong.
Tarrrr .....ninna soara ni gambiri on ma (Tarsonggot ma siboru i)
Alani songgotna, gabe dang sadar ibana mandok, "Ehh babi..."
Manigor hira babi bohina ala naung sala mandok.
Imajo taringot tusi. Dang pala binoto be sautna atik jadi do diarsik dekke na i. Lawak manang so lawak, urusanmu ma i.

 
 
 
 
 

Silahkan beri pendapat anda pada kolom komentar di bawah