Manuruknuruk, Manggarar Adat?

Sada utang na balga do di sahalak natoras molo ndang margarar adat nagok (marunjuk, mangadati) dope ianakhonna hombar tu ruhut-ruhut, patik, uhum habatahon.

Di ruhut-ruhut ni habatahon na so manggarar adat dang boi manjalo manang martunggu adat, ala mangihuthon adat habatahon i ma manjalo mangalean. Dang holan ripe manjalo inghon dohot mangalean. Molo dipandohan na asing didok dos do tuhukna hak dohot kewajiban. Dang tinghos girgir manunggu hak hape mandalanhon kewajiban dang diingot.

Sude do natoras marsintasinta naeng ma nian singhop ianakhonna manggarar adat nagok tu hulahulana asa unang marutang ibana molo top ngoluna sian hasiangan on, ai utang ni natoras do mambahen adat nagok (marunjuk, mangadati) ianakhonna.

Alai "Ndada simanuk-manuk sibontar andora, Ndada sitodo turpuk siahut lomo ni roha". "Tu ginjang ninna porda tu toru pambarbaran, Tu ginjang ninna roha patoruhon do sibaran". Naung tarsurat do di gurat-gurat ni tangan, topap di parsambubuan bagian dohot sibaran ni manisia sian sitompa hasiangan on (Debata).

Ala dang tolap dope sijamaon ni tangan lao manggarar adat nagok (mangadati) ianakhon parbogason sian na mangalua, mardos ni roha ma natoras dohot haha anggina, dongan tubu, parboruon, hulahulana, dongan sahuta asa lao Manuruknuruk tu huta ni simatua ni ianakhonna asa boi masileanan adat molo tung adong masa ulaon adat na marhula marboru.

Diboan ma sipanganon na marpanggoari tu bagas ni hulahulana. Somalna di na Manuruknuruk laos marhata sinamot atik pe holan uhumna do dihatahon balga ni sinamot i. Isarana; dihatahon balga ni sinamot Rp. 500 juta, alai patujolo ni sinamot holan Rp. 1 juta.

Ditinghi lao Pasahat Sulang-Sulang Pahompu huhut Manggarar Adat Nagok haduan manang dilaonlaon ni ari ro dope muse horong ni paranak "Manaruhon Batu ni Gambiri manang Situtungon" ni parboru patuahon panghataion di tinghi na Manurunuruk.

Andorang so sahat panggataion tu horong parboru jumolo ma mardalan: ungkap harbangan; sanghe hujur; pangihutihut, jala raja ni dongan sahuta (diparserahan) na gabe raja panise diharoro ni horong paranak di na Manuruknuruk i. Ai ianggo di ulaon marhusip, marhata sinamot, unjuk, mangadati, dongan tubu do raja panise diulaon i.

Ulaon Manuruknuruk sa sintongna nunga satonga ni ulaon nagok atik pe dijolo hata dipudi pambaenan. Alani molo tung adong pe ulaon adat di na marhula marboru dang apala sipangambati be di ruhut-ruhut, patik, uhum habatahon. Holan on tutu, dang mardalan dope ulos na marhadohoan di tinghi na Manuruknuruk. Isarana; ulos pansamot, ulos hela dohot ulos suhi ni ampang na opat. Ai inghon di ulaon adat nagok do mardalan ulos na marhadohoan sisongoni.

Molo boi pe na marhula marboru masilehonan adat dang na mandok molo nunga Manuruknuruk nunga sae manang singkop adat nagok, alai asa boi do na martondong masidiloan molo adong na masa manang adong ulaon adat di horong paranak songoni di horong parboru andorang so ulaon adat "Pasahat Sulang-Sulang Pahompu huhut Manggarar Adat Nagok".

Baca Juga Apa Sih Makna Simbol Ikan Mas Arsik Untuk Orang Batak? Kamu Wajib Tahu!

Baca Juga Hi Sista, Ini Dia Resep dan Cara Memasak Ikan Mas Na Ni Arsik Khas Batak Toba

Baca Juga Sedapnya Ikan Mas Tanpa Dimasak Khas Batak

Sa sintongna tung so adong do gabus di ruhut-ruhut, patik, uhum habatahon songon hata ni umpama namandok, "Patik sijujung ni ninggor, uhum sitinghos ari, I do gurat panorusi, tu Omputta Mulajadi". "Jongjong pe adati, tung na so jadi tabaon, Peak pe adati, Sitongha do langkaan".

Hape di ombas na parpudion nunga godang na mansemosemohon manang mangalipehon dohot alasan na marragam gabe dang adong andor sipaihutihuton ni sundut na umposo.

Santabi ma di amanta raja, inanta soripada, mangajana na pinarsangapan molo tung adong na hurang ampit di guretan na jompok on rade do manjalo panorangion tarsingot tu na Manuruknuruk on asa lam singkop na boi siparguruhonon ni sundut na umposo.

Harop do roha rade amanta raja, inanta soripada, mangajana na pinarsangapan mambahen pandapot tarlumobi ma di angha luat na marragam songon hata ni umpama, "Asing dolok asing sihaporna, Asing luat asing do nang adatna".

Mauliate....Horas....

Tabe sian hami....!!!

Catatan : Drs. Thomson Hutasoit.

Medan, 17 November 2021.

(Sekretaris Umum Punguan Borsak Bimbinan Hutasoit, Boru, Bere Kota Medan Sekitarna 2012-2020).